 |
We have found the one Moses wrote about in the law.
By
Kadarnath
کیدارناتھ
Published in Nur-i-Afshan Sep 20, 1895
نور افشاں مطبوعہ ۱۳ستمبر ۱۸۹۵ ء
کلام ِاللہ کے مختلف ۶۶ کتابوں کا متفرق مصنفوں کی معرفت تصنیف ہونے اور ا ن میں قسم قسم کے مضامین مندرج ہونے سے ہم دریافت کر سکتے ہیں کہ بعض نادان کو تاہ ا ندیشوں (کم علم ۔ کم فہم) کا محض کسی ایک ہی کتاب یا اس کے کسی ایک ہی مضمون سے کوئی بڑی اور اہم تعلیم پیدا کر لینا ایسا ہے۔ جیسے کوئی بیوقوف عقل کا اندھا اللہ کے مختلف کاموں میں سے صرف ایک ہی کو اپنے تجربہ کی بنیاد سمجھے نظربراں ہمارے محمدی بھائی بھی اس پہلو پر گئے کہ اللہ جل شانہ(جل جلالہ) کی کُتب ِمختلفہ توریت وزبور و صحائف انبیاء و اناجیل کو چھوڑ کر محض ایک ایسی کتاب کو جس کا الہامی ہونا کسی زمانہ بھی خدا کے لوگوں سے تسلیم نہیں ہو ا اپنے ایمان کی بیازسمجھ لیا اور خدا کے کُل سچے پیغمبروں سے رُوگرداں ہو کر صرف ایک ایسے شخص پر فریفتہ(عاشق۔فدا) ہو گئے جس کا بنی ہونا آج تک پایہ ثبوت سے خارج ہے۔ اس سب کے علاوہ نجات دہندہ کی تلاش میں خُدا کے کلام سے صرف ایک ہی آیت کو سندی مان کر اکیلے مرد خدا موسیٰ سے چند خیالی باتوں میں جن کو وہ آپ ہی طاقتور جانتے حقیقی نجات دہندہ کو مشابہہ گردانتے ہیں حالانکہ اس معاملہ میں خدا کا کلام اپنے اس کام سے جو اس نے ہماری نظروں کے سامنے پھیلا رکھا ہے یعنی خلقت کے کام سے مبانیت اور مغایرت (اجنبيت۔ نا موافقت)نہیں رکھتا دیکھو ملا کی نبی کی کتاب جو پُرا نے عہد نامہ کو ختم کرتی اس کے چوتھے باب کی دوسری آیت میں اللہ جل شانہ (جل جلالہ)یوں فرماتا ہے ۔ لیکن تم پر جو میرے نام سے ڈرتے ہو آفتاب صداقت طالع ہو گا اور اس کے پنکھوں میں شفاہو گی۴: ۲ ۔
اے ناظرین اپنی آنکھوں کو ذرا اُوپر اُٹھائيے اور فضاء میں نیر ّاعظم (سورج )کو ملاحظہ فرمائيے کہ کسی طرح سے خدا نے ان ہزارہا ہزار بلکہ بے شمار سیاروں کے واسطے اسے مرکز قرار دیا ہے کہ سب کے سب جن میں یہ ہماری زمين بھی شامل ہے شب و روز آفتاب کے گرد گھومتے اور رات و دن مہینہ سال تبدیلی موسم رات دن کا گھٹا ؤ بڑھاؤ اور پھر قوت ِ کشش اور سارے چاند ستاروں کا سورج سے روشنی پانا یہ سب کچھ خدا نے آپ ہی ٹھہرا دیا اسی طرح یہ آفتاب ِصداقت بھی جس کی تلاش میں ہم تم سب سرگرداں ہیں کلام ِالہٰی کے کُل واقعات اور حالات اور معجزات اور علامات اور انبیاء وغیرہ کُل کا مرکز سب پیغمبر اور بزرگ اور آباء اور سارے دیندار اس سے نور پا کر منور ہوتے ہیں۔
 |
جب یہ حال ہے تو یاد رکھنا چاہیے کہ خلقت میں کوئی چیز یا کوئی شخص ایسا نہیں جو اس کامل نور کی کامل علامت یا مشابہت ہو۔ ہاں ذرّہ کی مانند آفتاب چمکتا ہے لیکن ذرّہ کی روشنی جو ذرہ بھر ہے سورج کی روشنی سے جو روشنی کا معدن (نکلنے کی جگہ۔منبع)ہے مقابل نہیں ہو سکتی علی ہذا القیاس(اسی طرح) اگرچہ مردِ خدا موسیٰ کی نبوت میں میری مانند وارد (نازل ہونا)ہے اس سے یہ نہ سمجھ بیٹھو کہ اس میں جو موسیٰ کی نبوت میں میری مانند ہے یہی ہے جو موسیٰ میں ہے بلکہ اس میں بہت کچھ ہے جو موسیٰ میں نہیں ہے اس واسطے وعدہ سے بڑھ کر جو عنوان میں کیا گیا ہم یہ دکھا دیں گے کہ بائبل کے مختلف پیغمبر اور بزرگ کہیں بذاتہ (ذات کے لحاظ سے )اور کہیں باقوالہ(قول کے لحاظ سے) اور کہیں بافعالہ(عمل کے لحاظ ) صاف صاف کہہ رہے ہیں کہ وہ بنی یا بادشاہ یا کاہن ہماری مانند ہے اور یہ امر اگرچہ لوگوں کی نظروں میں عجیب ہو پر خدا تو سب کچھ کر سکتا ہے خدا کے بیٹے میں یہ طاقت ہے کہ وہ اپنے میں سے بہتیروں کو دے اور جو کچھ کہ اوروں کو دے اپنے میں کامل طور سے رکھے۔
جب یہ سب کچھ ہم بیان کر چکے تو اب ہمارا حق ہے کہ بیان کریں کہ کس طرح سے ہمارا نجات دہندہ خداوند عیسیٰ وہی نبی ہے جس کی بابت موسیٰ نے کہا کہ وہ میری مانند نبی ہو گا۔
اوّل ۔اس سبب سے کہ بہتیرے دُکھ اُٹھا کر اور ہلاکت کے خطروں میں پڑ کر موسیٰ نے مرد ِ خدا با ضافت حرف وال خطاب پایا لیکن خداوند عیسیٰ صلیب پر جان دے کر مرد ِخُدا بغیر اضافت حرف وال ثابت ہوا زیادہ آسانی سے سمجھنے کے واسطے ہم ان ہر دو الفاظ کو مقلوب(اُلٹا کرنا۔پلٹنا) کر کے دیکھیں یعنی خدا ۔مرد اس میں موسیٰ اپنے لقب سے خداوند عیسیٰ میں دو ذاتوں الوہیت (خُدا) اور انسانیت کا (مرد) بہ لحاظ تذکیر برفع تانیث اشارہ دیتا ہے ۔ اور ایسا عجیب شخص چونکہ دنيا میں اور کوئی نہیں ہو اپس ثابت ہوا کہ عیسیٰ موسیٰ کی مانند ہے۔
دوئم۔ اس سبب سے کہ موسیٰ نے جس وقت چٹان کو دو بار لاٹھی سے مارا تو یوں کہا کہ سنو اے باغیو کیا ہم تمہارے لئے چٹان ہی سے پانی نکال لائیں گنتی ۱۰:۲۰ اور اس لئے خداوند تعالیٰ نے جو اپنی عزت کسی دوسرے کو نہیں دیتا فرمایا کہ تم مجھ پر اعتقاد نہ لائے تا کہ بنی اسرائیل کے حضور میری تقدیس کرتے سو تم اس جماعت کو اس زمین میں جو میں نے انہیں دی ہے نہ لاؤ گے ۔ گنتی ۲۰: ۱۲ اور فرمایا کہ عباریم کے کوہستان بنو کے پہاڑ جو موآب کی سرزمین میں یریحو کے مقابل ہے۔ چڑھ جا اور کنعان کی سرزمین کو کہ جسے میں اسرائیل کا ملک کر دُوں گا ۔ دیکھ اور اس پہاڑ پر جس پر تُو جاتا ہے مر جا۔ استثنا ۳۲: ۴۹، ۵۰ اس ماجرے سے بزبان حال موسیٰ نے ہم کو خبر دی کہ وہ بنی جو میری مانند آئے گا یہ عزت اور جلال اور قدرت خود اختیاری اسی کا حصّہ ہے چنانچہ عیسیٰ ناصری نے ایک کو ڑھی سے کہا کہ میں چاہتا ہوں تو پاک ہو مرقس ۱: ۴۱ اور مفلوج کو حکم دیا کہ میں تجھے کہتا ہوں اُٹھ مرقس ۲ :۱۱ پھر ایک مُردہ لڑکی سے فرمایا اے لڑکی میں تجھے کہتا ہوں اُٹھ مرقس ۵ : ۴۱ وغیرہ لیکن اگر مردِ خدا موسیٰ اپنی طرف سے پانی چٹان کا نکالتے ہوئے مجرم قرار پایا تو اور کون شخص ہے جو ایسا کلمۂ کفرزبان سے نکالے اور خدا اس سے کچھ نہ کہے کیا خدا کے یہاں اند میرہے ۔ پس اس دلیل سے ثابت ہوا کہ وہ جو اپنے ہی حکم سے مُردہ جلاتا کوڑھی پاک کرتا مفلوج کو چنگا کرتا ضرور موسیٰ کی مانند ہے۔ نہ موجبا ًبلکہ سائباً پس عيسیٰ موسیٰ کی مانند ہے ۔
 |
سوم ۔اس سبب سے کہ جس وقت موسیٰ پہاڑسے اُتر گیا اور شہادت کے دونوں تختے اس کے ہاتھ میں تھے وہ تختے لکھے ہوئے تھے دونوں طرف ادھر اُدھر لکھے ہوئے تھے۔ اور وہ تختے خدا کے کام سے تھے جو لکھا ہوا سو خدا کا لکھا ہوا اور ان پر کندا کیا ہوا تھا خروج ۳۲: ۱۰، ۱۵ اور یوں ہوا کہ جب وہ لشکر گاہ کے پاس آیا اور بچھڑا اور ناچ راگ دیکھا تب موسیٰ کا غضب بھڑکا اور اس نے تختے اپنے ہاتھ سے پھینک دے اور پہاڑ کے نیچے توڑ ڈالے خروج ۳۲: ۱۹ پھر خداوند نے موسیٰ سے کہا کہ اپنے لئے پہلی لوحوں کے مطابق دولو حیں پتھر کی تراش اور میں ان لوحوں پر وہ باتیں جو پہلی لوحوں پر تھیں ۔ جنہیں تو نے توڑ ڈالا لکھوں گا خروج ۳۴ : ۱ اس ناروافعل (نا مناسب کام)یعنی لوحوں کے توڑ ڈالنے سے موسیٰ نے صاف اشارہ دیا کہ اگرچہ میں نے خدا کی تراشی ہوئی اور لکھی ہوئی لوحیں توڑ دیں اور پھر حکم کے مطابق دوسری لوحیں تیار کیں لیکن ایک میری مانند آئے گا ۔ جو اس توڑی ہوئی شریعت کو پھر جوڑ دے گا اور شريعت الہٰی از سر نو(نئے سرے سے ) بغیر اس کے کہ ٹوٹے قائم ہو گی اس لئے وہ دنیا میں آتے ہوئے کہتا ہے کہ ذبیحہ اور ہدیہ تو نے نہ چا ہا پر میرے لئے ایک بدن تیار کیا سوختنی قربانی اور خطا کی قربانیوں سے تو راضی نہ ہو ا تب میں نے کہا کہ دیکھ میں آتا ہوں میری بابت کتاب کے دفتر ميں لکھا ہے تا کہ اے خدا تیری مرضی بجالاؤں عبرانيوں ۱۰: ۵، ۶، ۷ اور یہ کوئی اور شخص نہیں مگر خداوند عیسیٰ پس عیسیٰ موسیٰ کی مانند ہے۔
چہارم ۔ اس سبب سے کہ موسیٰ بذاتہ بیان میں بنی اسرائیل کے ساتھ موجود تھا وہ کوئی وہمی یا خیالی نہ تھا بنی اسرائیل اپنی آنکھوں سے موسیٰ کو دیکھتے تھے ان کے ہاتھوں نے ا اُسے چھوُا اُن کے کانوں میں اس کی آواز آتی تھی تو بھی وہ جس کی بابت موسیٰ نے اپنی نبوت میں اپنی مانند کہا کوئی ایسا شخص ہے جو حقیقت میں موجود ہستی اور قائم بذات ہو اور اس وقت ان کے درمیان وہی کام کرتا ہوا اور خدا کے کلام سے ثابت ہوتا ہے کہ ایک ایسی ہستی بیابان میں بنی اسرائیل کے ساتھ برابر تھی اور اگرچہ موسیٰ مر گیا تو بھی وہ نہ مری بلکہ جب یشوع موسیٰ کا جانشین یریحو کے مقابل جاتا تھا تب وہی ہستی خداوند کے لشکر کا سردار بن کر اسے نظر آئی اور اسے حکم دیا کہ اپنے پاؤں سے اپنی جوتی اُتار کیونکہ یہ مکان جہاں تو کھڑا ہے مقدس ہے یشوع ۵: ۱۵ اور مقابلہ کے لئے خروج ۳: ۵ اور یہ شخص کوئی انسان نہیں ہو سکتا کیونکہ ہر زمانہ میں مثل موسیٰ کے جو ایک محدود زمانہ میں ۴۰ برس تک بنی اسرائیل کے ساتھ تھا ان کے ساتھ رہا اور اب بھی ہے یہ صرف خداوند مسیح پر صادق آتا ہے جس نے فرمایا کہ پیشتر اس سے کہ ابراہیم ہو میں ہوں پس عیسیٰ موسیٰ کی مانند ہے۔
پنجم اس سبب سے کہ جب موسیٰ خداوند کے آگے جاتا تھا کہ اس سے کلام کرے تو جب تک باہر نہ آتا نقاب کو اُتار دیتا تھا خروج ۳۴: ۳۴ جیسا کہ پولس رسول فرماتا ہے کہ آج تک پُرا نے عہد نامہ کے پڑھنے میں وہی پردہ رہتا ہے اور اُٹھ نہیں جاتا کہ وہ پر دہ مسیح سے جاتا رہتا ہے۔ ۲ کرنتھیوں ۳: ۱۴ اور ہم موسیٰ کی طرح عمل نہیں کرتے جس نے اپنے چہرہ پر پردہ ڈالا ۔ ۲کرنتھیوں ۳: ۱۴ پر موسیٰ اس نقاب کے ڈالنے سے ظاہر کرتا تھا کہ خداکو کسی نے کبھی نہ دیکھا اکلوتا بیٹا جو باپ کی گود میں ہے اس نے بتلا دیا یوحنا ۱: ۱۸ پس اگر موسیٰ نے ایسا کیا تا کہ بنی اسرائیل اس اُٹھ جانے والے کی غایت(آخر۔ انجام) تک بخوبی دیکھیں تو کیوں نہ ہم اس کے وسیلہ ’’ جو خدا کا چہرہ کہلاتا ہے یعنی خدا کے جلال کی پہچان کا نور یسوع مسیح کے چہرہ سے ہم میں جلوہ گر ہو‘‘ ۔ اس غایت(انجام) تک بخوبی دیکھیں۔ اور چونکہ ایسا اور کوئی شخص دنیا میں ابتک ظاہر نہ ہوا لہذا ثابت ہوا کہ عیسیٰ موسیٰ کی مانند ہے۔
 |
ششم ۔اس سبب سے کہ جب موسیٰ بڑا ہوا تو اپنے بھائیوں کے پاس باہر گیا اور ان کی مشقتوں کو دیکھا اور دیکھا کہ ايک مصری ايک عبرانی کو جو اُس کے بھائيوں ميں سے ايک تھا مار رہا ہے ۔خُروج( ۲ ۔ ۱۱) پھر اُس نے ادھر اُدھر نظر کی اور ديکھا کہ کوئی نہيں تب اس مصر ی کو مار ڈالا اور ریت میں چھپا دیا ۲: ۱۲ جب فرعون نے یہ سنا تو چاہا کہ موسیٰ کو قتل کر ے پر موسیٰ فرعون کے حضور سے بھا گا خروج ۲: ۱۵ ایمان سے موسیٰ نے سیانا ہو کے فرعون کی بیٹی کا بیٹا کہلانے سے انکار کیا کہ اس نے خدا کے لوگوں کے ساتھ دکھ اُٹھا نا اس سے زیادہ پسند کیا کہ گناہ کے سکھ کو جو چند روزہ ہے حاصل کرے کہ اس نے مسیح کی لعن طعن کو مصر کے خزانوں سے بڑی دولت جاتا کیونکہ اس کی نگاہ بدلا پانے پر تھی عبرانیوں ۱۱: ۲۴، ۲۵، ۲۶ پس تمہارا مزاج وہی ہو جو مسیح یسوع کا بھی تھا کہ اس نے خُدا کی صورت میں ہو کے خدا کے برابر ہونا غنیمت نہ جانا لیکن اس نے آپ کو نيچ کیا کہ خادم کی صورت پکڑی اور انسان کی شکل بنا اور آدمی کی صورت میں ظاہر ہو کےاپنے آ پ کو پست کیا اور مرنے تک بلکہ صیلبی موت تک فرمانبردار رہا افسیوں ۲: ۵: ۸ یسوع کو جو ایمان کا شروع اور کامل کرنے والا ہے تکتے رہیں جس نے اس خوشی کے لئے جو اس کے سامنے تھی شرمندگی کو ناچیز جان کے صلیب کو سہا عبرانيوں ۱۲: ۲ یہاں پر ہم کو محمدیوں کے ایک صوفی یعنی سعدی کا شعر یاد آتا ہے جو اس نے بھو ل کر خدا کی صفت میں یوں کہا ۔
اس سے ثابت ہوتا ہے کہ عیسیٰ موسیٰ کی مانند ہے۔
ہفتم ۔اس سبب سے کہ پولوس رسول نے اپنے رسالہ بنام عبرانیوں میں یوں فرمایا کہ پس اے۔ پاک بھائیو جو آسمانی دعوت میں شریک ہوئے اُس رسول اور سردار کاہن مسیح یسوع پر جس کا ہم اقرار کرتے ہیں غو ر کرو کہ وہ اس کے آگے جس نے اسے مقرر کیا امانت دار تھا جس طرح موسیٰ بھی اپنے سارے گھر میں تھا بلکہ وہ موسیٰ سے اس قدر زیادہ عزت کے لائق سمجھا گیا جس قدر گھر سے گھر کا مالک زیادہ عزت دار ہوتا ہے کہ ہر ایک گھر کا کوئی بنانے والا ہے پر جس نے سب کچھ بنایا سو خدا ہے۔ اور موسیٰ تو اپنے سارے گھر میں خادم کی طرح دیانتدار رہا کہ اُن باتوں پر جو ظاہر ہونے کو تھیں گواہی دے ۔پر مسيح بيٹے کی مانند اپنے گھر کا مختار رہا ۔عبرانيوں ۳ : ۱۔۶ پس عيسیٰ موسیٰ کی مانند ہے۔
 |
اگرچہ دلیلوں اور مشابہتوں کا شمار بہت بڑھ سکتا ہے پر ابھی سچائی کا متلاشی جو خدا سے ڈر کر نجات کا اُمید وار ہے انہیں سات مشابہتوں سے یقین کر سکتا ہے کہ آنے والا نجات دہندہ یسوع ناصری ہے جیسا کہ فلپس نے نتنی ايل سے کہا کہ جس کا ذکر موسیٰ نے توریت میں اور نبیوں نے کیا ہے ہم نے اسے پایا وہ یوسف کا بیٹا یسوع ناصری ہے یوحنا ۱: ۴۵ اور وہ ۱۲ دلائل جو پہلے سلسلہ میں درج ہیں ملا لو۔ اب ہم حسب وعدہ ذیل کے دائرہ میں آپ سب صاحبوں کو یہ دکھلانا چاہتے ہیں کہ جس طرح خلقت کے کام میں خدا نے صرف سورج کو مرکز قرار دیا ہے ۔۔ اُسی طرح اس نے اپنے کلام میں کل امور کا مرکز خدا وند یسوع مسیح کو ٹھہرایا ہے۔
یہ نقشہ اگرچہ کامل اور تمام واقعاتِ بائبل کو حاوی نہیں تو بھی مشتے نمونہ از خروارئے واندک از بسیارے اس کے دیکھنے سے اتنا تو ضرور معلوم ہوگا کہ جب اہم معاملات میں کل کا مرجع خدا وند عیسیٰ ہے خواہ پیشن گوئی ہو خواہ علامتی فعل ہو تب چھوٹا واقعات کیوں ہو گا اگر اتنے پر بھی کوئی حجتی نہ مانے تو وہ جانے مگر خاص کر ہم محمدی مولویوں کو نصیحت کے طور پر دو ستانہ صلاح دیتے ہیں ۔ کہ اگر ہو سکے تو اپنے محمد صاحب کو اسی طرح بغیر مغالطہ منطقی تعصب کو علیحدہ کر کے اور خدا سے ڈر کے ایک صاف نقشہ میں تصور کی مانند دکھائیں ورنہ اس کہانی کے مصداق(ثبوت) نہ ہوں جو ہم نے ایک کتاب میں پڑھی کہ کوئی بیل بھوسہ کے ڈھیر کی طرف اس غرض سے گیا کہ کچھ اس میں سے کھائے مگر ایک کتّا جو اس ڈھیر کے اوپر بیٹھا تھا زور سے بھونکا تب بیل نے کہا کہ جس حال کہ تم بھوسہ نہیں کھا سکتے تو ان کو جن کی یہ خوراک ہے کیوں روکتے ہو۔ بھائی تمہارا تو یہی رزق کا حیلہ ہے کہ محمد ی لوگ تمہاری کتابوں کو خرید لیں اور تم کو فائدہ ہو تمہارا پیٹ چلے لیکن وہ بے چارے جہنم میں جائیں اس لئے توبہ کرو اور اس پر جو آدم سے ابتک اور آیندہ قیامت تک کُل آ دم زاد کا نجات دہندہ ہے ۔ ایمان لاؤ اور اس کی سنو جو کچھ وہ تمہیں کہے ۔ایسانہ ہو کہ یہودیوں کی طرح تم بھی مواخذہ (جواب طلبی)میں آؤ اور اگر بعقیدہ شما تم ہاجرہ ہے کے فرزند ہو تو یادکر و کہ تمہارا زیادہ حق کہ مسیح خداوند سے برکت لو ۔کاش کہ خدا ایسا ہی کرے آمین ۔ طفیل سید المرسلین فرزند رب العلمین خداوند یسوع شفیع المذنبین۔