اِسی طرح جب تُم اِن سب باتوں کو دیکھو

Even so, when you see all these things,you know that it

By

One Disciple

ایک شاگرد

Published in Nur-i-Afshan December 3,1891

نور افشاں مطبوعہ ۳دسمبر ۱۸۹۱ ء

اِسی طرح جب تُم اِن سب باتوں کو دیکھو تو جان لو کہ وہ نزدیک بلکہ دروازے پر ہے(متی ۳۳:۲۴)

’’   یہ  سب دیکھو  ‘‘  ۔ یعنی  مسیح کے  آنے  کی علامتیں  ۔   منجملہ  جن  کے یہ کہ جھوٹے مسیح   اور جھوٹے   نبی  اُٹھیں گے۔  اور ایسے  بڑے  نشان   اور کر امتیں  (انوکھا پن)دکھائیں  گے۔  کہ اگر ہو سکتا  تو  برگزیدوں  (خُدا کے چُنے ہوئے)کو بھی  گمراہ   کرتے   ‘‘۔   ہم  آج کل اپنے ہی ملک  میں کیسا  صاف  دیکھ رہے  ہیں۔  کہ کوئی مہدی  اپنے کو ظاہر  کرتا ۔  تو کوئی  اپنے کو مثيلِ   مسیح  ٹھہراتا ہے۔   اور کتنے  ہیں  جو ان کے  معتقد و مرید(اعتقاد رکھنے والا و چيلا)ہو کر  بدل  و جا ن  ان کی الہٰی   رسالت(خُدا کی طرف سے رسول ہونا ) کو  یقین   کئے ہو ئے   ہیں۔  سچ ہے نفس   الا مر(حقيقت) میں کسی کو  کچھ اختیار  نہیں ۔ اسی لئے  کلام  اللہ   کی پیشین  گوئیاں  ہماری  ہدایت   کے لئے   لکھی  گئی ہیں۔  کہ کسی جھوٹے  مسیح  یا  جھوٹے  نبی  کو اپنا مسیح  ہر گز نہ مانیں۔  لیکن جن کے پا س  پیشن  گوئیوں  کا یہ بے بہا خزانہ  نہیں۔ وہ  بآسانی  ہر کسی   مدعی  مسیحائی  (مسيح ہونے کا دعویٰ کرنے والا)کے دام ِعقیدت  میں پھنس  جاتے ہیں ۔ جیسا   کہ ہمارے  معزز  مرزا   موحد صاحب ۔ مرزا  غلام  احمد صاحب   قادیا نی  کے دعوی ٰ   مماثلت   ِمسیح(مسيح کی مانند ہونا) پر   مٹے  ہوئے ہیں ۔  اور انہیں  جو ان کے  خلافِ  عقیدہ   ہیں۔  اور قادیانی  صاحب   کی مسیحائی  کو تسلیم   (ماننا)نہیں کرتے  ۔ صلواتیں(بُرا بھلا کہنا)  سناتے ۔ اور جو   چاہتے ہیں  وزیر   ہند  میں ان کی  نسبت   بُرا   بھلا لکھتے  ہیں ۔ چنانچہ   وزیر ِ  ہند  مطبوعہ   ۱۵  نومبر   میں ایک  لیڈر آپ   نے بعنوان  ’’ مسیح   الزمان   ‘‘   شعر  ہذا   کے ساتھ  شروع کيا ہے۔

                                                 ’’  تجھ سا  کوئی  زمانہ میں معجزیاں نہيں۔ آگے  تیرے مسیح  کے منہ  میں زبان  نہیں  ‘‘۔

پھر   آپ  نے ان کے مباحثہ  دہلی  کا ذکر  کر کے  ۔ دہلی   والے ایک  دوسرے   مُدعی   مسیحائی  کی  تردید   فرمائی ہے۔  اور قادیانی  صاحب  کے بڑے  گُن   گا کے ۔ ہمارے  حال پر مہربانی   فرمائی ۔ اور لکھا  ہے  کہ  ’’ مگر    وہ لوگ   خصوصاً ایڈیٹر  نورِا فشاں  کہ جو آنحضرت    کے سامنے  توطفلِ  مکتب(طالب علم۔نا تجربہ کار شخص)  کی طرح  بیٹھا   ہوا چُپکا منہ  تکتا رہتا ہے۔

اور  مشن   میں جا کر  جو جی  میں آتا ہے  دھر گھسیٹتا   ہے۔ علیٰ   ہذا(اسی طرح) آج  کل   اکثر  اخبارات  میں مسیح   الزمان  کے خلاف   واقعات   لوگوں  نے لکھنے  شروع  کئے ہیں۔  جن کو  ہم پڑھ  کر  تعجب   (حيرت)کی  نگاہ  سے دیکھتے ہیں۔ حالانکہ  ان لوگوں کو مسیح  الزمان  کی خوبیوں اور کمالات   کے دیکھنے  کا کبھی موقع   خواب   و خیال  میں بھی نہیں   ملا ۔ وہ گھر  بیٹھے   ان  کے خلاف  طبع آزمائی(ذہانت کا امتحان) کر رہے ہیں ‘‘۔  پس اس کے جواب   میں صرف  اتنا  لکھنا   مناسب  جانتے ہیں   ۔کہ  ہم صرف   ایک مرتبہ  معہ لالہ  اُمراؤ   سنگھ صاحب  سیکرٹری    آریہ   سماج    لودیانہ   اور د و ایک  معزز   اہل  ِشہر   کے ان سے   ملنے  کے لئے (  جب  کہ  وہ لودیا نہ  میں مقیم  تھے)   گئے اور جیسا   آپ فرماتے  ہیں طفل   مکتب(طالب علم )    کی طرح  بیٹھے   ہوئے چپکے   منہ   تکتے  رہنے   کے لئے  نہیں لیکن   صرف یہ   دریافت   کر نے کو ۔ کہ آپ  جو خلافِ   عقیدہ   عام اسلام  ۔ مسیح  کی وفات  کے قائل(تسليم کرنے والے)  ہیں۔

مہربانی   کر کے یہ بھی  بتا  سکتے ہیں کہ اس کی صورت   و طرح وفات   کیا تھی۔  اور جو جو اب    آپ نے دیا  ہم نے اسی   ہفتہ   کے نورِافشاں  میں شائع کر دیا ۔ دوسرا  سوال  بائبل   مقدس    کی اصلیت   و تحریف   (بدل دينا)کے بار ہ میں تھا    ۔جن کے جواب   میں   مرزا   صاحب  نے  فرمایا   کہ یہ ایک  طویل (لمبی) اور بحث   طلب  بات   ہے۔ جس کی نسبت   حالت  ِموجود ہ میں  وہ کچھ  بھی  نہ بولے  ۔ اور ایک مرتبہ    حسب   الطلب  ۔ اس بے فائدہ    مباحثہ   میں مرزا  صاحب  کو دیکھا۔ جو لودیانہ  میں مولوی   محمد حسن   صاحب  کے مکان   پر مولوی   محمد   حسین   صاحب بٹالوی   کے ساتھ  ہو  ا تھا۔  وہاں کسی   تیسرے   شخص   کے بولنے  کی ضرورت  نہ تھی۔  موحد صاحب  کو یوں  تو اختیار  ہے  کہ وہ  قادیانی   صاحب  کو مسیح  الزمان   کیابلکہ   جن  کے   رُوبُرو   (بقول  ان کے )مسیح بھی بے  زبان   ہے سمجھیں   ۔ لیکن  مناسب  نہیں  کہ وہ اوروں  کو۔ جو ان کے ایسے مہمل  الہام   ( بے معنی الہام )اور مثيلِ  مسیح(مسيح کی مانند)  ہو نے کے دعویٰ  کو قبول  نہ کریں۔   بُرا  بھلا کہیں۔ 

 خُداوند   مسیح۔ جس کے  مسیحی   منتظر   (انتظار کرنے والے)ہیں۔  جب   پھر دُنیا   میں تشریف   لائے گا ۔  تو اس کو  مولویوں اور پنڈتوں  کے ساتھ   مباحثہ   (بحث )کرنے  ۔ کتابیں   چھپوا  کے فروخت  کرنے ۔  اور اشتہارات  جار ی   کرنے کی کچھ   ضرورت  نہ  ہو گی۔  ۔ ’’ کیونکہ   جیسے بجلی    پورب(مشرق)  سے کوند کے پچھم   (مغرب)تک چمکتی   ویسا ہی  ابن آدم  کا آنا   بھی ہو گا‘‘۔  پس موحد صاحب   ہم سے ناراض   نہ ہوں  ۔ کیونکہ   ہم مسیحی لوگ  کسی مثيل   کے منتظر  نہیں۔ بلکہ   مسیح ہی   کے منتظر ہیں۔ جس کے لئے  بوقت   صعود(آسمان پر جاتے وقت)  فرشتوں   نے رسولوں  سے کہا  کہ  ’’ اے گلیلی  مردو۔   تم کیوں  کھڑے  آسمان کی طرف  دیکھتے   ہو۔  یہی یسوع   جو تمہارے   پاس سے آسمان  پراُٹھایا گیا اسی  طرح   جس طرح تم  نے  اُسے آسمان   کو جاتے   دیکھا پھر  آئے گا۔ اعمال   ۱: ۱۱  یہی   وجہ ہے کہ مسیحیوں  نے قادیانی  صاحب  کے دعوؤں   اور الہاموں  پر  مطلق  (بالکل)تو جہ  نہ کی۔  اور ہے بھی یوں  ۔ کہ قادیانی   صاحب   محمدیوں  ہی کے   سامنے اپنی   مسیحائی  کو پیش  کر  رہے ہیں۔  اور ان   کا رقیب(ہم پيشہ۔مقابلہ کرنے والا)  بھی  جو دہلی  میں کھڑا  ہوا وہ   محمدیوں  میں سے ہے  مسیحیوں  کو ایسی بے  سود  باتوں  سے کچھ   سرو کار (مطلب)نہیں   ۔ موحد صاحب  ناحق  ہم پر اپنی   خفگی  (ناراضگی)ظاہر کرتے ہیں۔