 |
The Gospel First Good News
By
Kidarnath
کدارناتھ
Published in Nur-i-Afshan March 13, 1890
نور افشاں مطبوعہ ۱۳مارچ ٫۱۸۹۰
لوگ ہم سے کبھی کبھی دریافت کرتے ہیں کہ عیسی مسیح تو قریب (۱۹۰۰) برس گزرے کہ اس دُنیا پر ظاہر ہوئے اُن سے پیشتر دُنیا نے کیونکر نجات حاصل کی ۔ اگر یہ کہا جائے کہ اُن کی جو خداوند مسیح سے پیشتر اس دُنیا میں زندگی بسر کرکے نجات نہیں ہوئی ۔اس میں بڑا ظلم اور بے رحمی پائی جائے گی کہ جب اُن کو دیا نہیں گیا تو ان سے کیونکرمانگا جاتا ہے کہ جب اُنہوں نے عیسیٰ کی نجات کی خبر نہیں پائی وہ عدم(نہ ہونا) ایمان کے ذمہ دار نہیں ہوسکتےوہ کس پر اور کس پیغام پر ایمان لاتے؟ اگر یہ کہا جائے کہ وہ خدا کے فضل سے بچ گئے خدا نے ان پر رحم کیا تو عدل شکست کھاتا ہے کہ عیسیٰ نے تو ابھی نہیں دیا تھا اورخدا کی شریعت اُن کے مخالف تھی اور اُس کا عدل اُن کا سامنا کرتا تھا ۔
میں نہایت مناسب جانتا ہوں کہ ہم دیکھیں کہ خدا کے کلام یعنی بائبل میں اس کا کیا جواب ہے ؟ کلام میں آشکارہ ہے کہ انبیا لوگ روح القدس سے تحریک پاکر بولتے تھے اس لئے اُن کی باتوں کا سمجھنا روح کی مدد سے ہوسکتا ہے ورنہ جسمانی مزاج کا آدمی اُن کو ہرگز نہیں سمجھے گا کہ وہ اُس کےنزدیک بےو قوفیاں ہیں ۔
نجات
نجات کس کو کہتے ہیں؟ دُنیا کے مذہبوں اور کتابو ں میں اس کا ایک اور محدود جواب نہیں ملتا اور ہم یہاں پر اُن کے بیانات درج نہیں کریں گے کہ موقعہ نہیں ہے کہ علیحدہ علیحدہ اہل مذہب و کتب مسیحی نجات کی تعریف و تشریح کے ساتھ اُن کا مقابلہ کرکے معلوم کر سکتا ہے کہ اُن میں اور اس میں آسمان و زمین کا فرق ہے ۔ نجات کے معنی ہیں چھٹکارا اور رہائی یا خلاضی لفظ نجات یاخلاضی سے صاف معلوم ہوتا ہے کہ انسان کسی قید میں مقید ہے کہ اُس کو اس قید سے رہائی نہایت ضرور ہے اور اس رہائی کو نجات اور رہائی بخشندہ (بخشنے والا)کو نجات دینے والا یا منجی کہتے ہیں ۔ اب نہایت واجب معلوم ہوتا ہے کہ اس قید کی تشریح بھی کی جائے جس میں انسان مقید رہتا ہے اور وہ یہ ہے ۔
گنا ہ کی مزدوری موت ہے پس یہ قید موت کی قید ہے اور موت تین قسم کی ہے ۔
اول ۔
جسم کی موت کہ خدا نے آد م کو فرمایا کہ تو مٹی کے ساتھ مل جائے گا ۔ یہ فقط اُس کے جسم کی بابت کہا گیا ہے کہ روح تو خواہ راستبازوں کی خواہ شریروں اور بے ایمانوں کی اس فانی قالب(عارضی انسانی جسم) خیمہ ساخاکی گھر سے نکل کر ابدی اورجاوید اپنے گھروں اور قیامتی بدنوں میں جا رہیں گی ۔
دوم ۔
اس دُنیامیں شریروں اور بے ایمانوں کا خدا کے قہر اور شریعت کی لعنت کے تحت میں رہنا جیسا لکھا ہے ۔ ’’اوراُس نے تمہیں بھی جوخطاوں اور گناہو ں کے سبب مردہ تھے زندہ کیا ‘‘۔’’ مردہ تھے زندہ کیا‘‘ ۔ واہ خدا کی خیر اور رحمت اور محبت کا کون بیان کر سکتا ہے کہ حالانکہ گناہ کی مزدوری موت ہے اور یہ موت ہم پر عاید ہوگئی ہے تو بھی ہم ضمیر کی نسبت زندہ ہیں اور ہمارا یہ فانی خیمہ سا خاکی گھر کچھ مدت تک اس زندگی کے متعلق رہتا ہے اس غرض سے کہ اگر ہم چاہیں اور خدا سے مدد کے طالب ہوں تو وہ ہم پر رحم کرنے کو تیار ہے کہ ہم اس زندگی میں موت کی تینوں اقسام سے رہائی اور نجات حاصل کریں نہ اپنے نیک کاموں سے کہ مردوں میں طاقت کہاں کہ ہمیشہ کی زندگی کے کام کریں اُس تد بیر کے وسیلہ جو ’’ خدا نے جو رحم میں غنی ہے اپنی بڑی محبت سے جس سے اُس نے ہم کو پیار کیا ہم کو جو گناہوں کے سبب مردہ تھے ۔مسیح کے ساتھ جلایا ‘‘۔
 |
لاکھوں کروڑوں بلکہ بے شمار گروہ جواب دنیا میں اس تد بیر سے زندہ ہو کر خدا کے لئے اس فانی گھر میں رہ کر نہایت خوشی اور آزادی کے ساتھ اپنی زندگی بسر کرتے ہیں اوراس سے بھی زیادہ بے شمار گروہ ہر ایک قوم اور فرقہ اور لوگ اور اہل زبان میں سے ایک ایسی بڑی جماعت جسے کوئی شمار نہیں کر سکتا سفیدجامے پہنے اور خور مے(کھجور) کی ڈالیاں ہاتھوں میں لئے اُس تخت اور برہ کے آگے کھڑی ہے اور بلند آواز سے چلا کر یوں کہتی ہے کہ نجات ہمارے خدا سے جوتخت پر بیٹھا اور برہ سے ہے اس حق پر شہادت دیتے ہیں کہ خدا نے بڑے رحم سے فضل کرکے ہماری نجات کے لئے تجویز نکالی ہے کہ ہم خداوند مسیح کی موت کے سبب اس موت کی قید سے رہائی پاکر ہمیشہ کی زندگی کےوارث ہو سکتے ہیں ۔ پر اس زندگی میں اور پیشتر اُس حالت کے کہ جس میں انسان کا دل ایسا سخت ہو جاتا ہےکہ حد سے زیادہ تا خیر ہوگی او ر انسان اس تدبیر کوقبول کرتا ہی نہیں ایسوں پرموت کی تیسری قسم ضرو ر ہی عاید ہوتی ہے یعنی تعلیم ۔
(۳) ۔ ابدی موت جس میں کچھ مدت تک روح کو اور پھر قیامت کے بعد روح کو غیر فانی قیامتی کےساتھ دُکھ اور غذاب میں رہنا ہوگا اسے تیسری قسم کا نام دوزخ و جہنم ہے ۔
اب موت کے ان تینوں اقسام سے رہائی ۔ چھٹکارہ یاخلاصی پانے کو بائبل نجات قرار دیتی ہے اور خدا وند مسیح کو اس کا وسیلہ مرکز اور درمیانی اور بخشنے والا ٹھہراتی ہے اور خدا کو اس کا بانی اور روح القدس کو اس کا ظاہر کرنے والا اور اپنی تاثیرے دل پر اُس کا نقش کرنے والا اور مردہ دل کو زندہ کرنے والا بتاتی ہے ۔ ابھی تک سائل کو جواب نہیں ملا ہم یہ بات جانتے ہیں اور میں عجز اور ڈر اور ادب سے التماس کرتا ہوں کہ سوال ہی غور طلب اور بھاری ہے کہ یہ انسا ن کی پوری توجہ اور رجوع اور فرمانبرداری کا حق دار طالب ہے ۔ یاد رکھنا چاہئے کہ ہم دونوں وقت اور اہدیت کے قرضدار ہیں وقت سے مراد ہے بالشت بھر (انگوٹھے سے چنگلی انگلی کا درمیان کا فاصلہ)کی زندگی ہے اور ابدیت وہ زمانہ ہے جواس فانی گھر سے خارج ہونے کے وقت شروع ہو گا اور کبھی ختم نہ ہو گا اس زندگی کے قرض ہیں یعنی ہمیں کوئی بے علم اوراچھا کا م اختیار کرکے اپنے اور اپنے لواحقوں کے فرائض پورے کرنے نہایت ضروری ہیں اور ساتھ اس کے اپنی ابدی زندگی کا ہمیشہ خیال رکھنا اور اس کی یاد میں رہنا اور اس کے لئے تیار رہنا بھی نہایت لازم اور واجب ہے ورنہ ہم اُس کو بھول کر حیوان مطلق کے درجہ تک آپ کو ذلیل کردیتے ہیں ۔
اے میرے بھائی سائل ذرا صبر سےاس طرف توجہ کیجئے اور تھوڑی سی طوالت سے ہر گزنہ گھبرائیں کہ میں معذور ہوں میں نے سمجھا تھا کہ آپ کے سوال کا جواب نورافشاں کے ایک ہی پر چہ میں اظہار ہوسکتا ہے مگر عمیق (گہرے)غور سے معلوم ہوتا ہے کہ شاید تین یا چار پرچوں میں ظاہر ہوکہ مجھے یقین ہے کہ ہمارے معزز اور عزیز ایڈیٹر صاحب مہر بانی کر کے اس مضمون کو سلسلےاور اپنے اخبار میں جگہ دےکر مجھے زیر بار احسان کرئے گئے اور میں بھی کوشش کر و ں گا کہ اس جواب کوسلسلے وار ختم کروں ۔